علاء يكتب انضموا لحزب الوفد اكرم لكم

يا ريت متشتمش عشان بتنفر ناس من قضيتك
يا ريت بلاش تطول شعرك عشان المنظر الغريب بينفر الناس من قضيتك
يا ريت متحبش في العلن عشان فيه ناس محافظة انت كده بتنفرهم
يا ريت بلاش بنات تبات في الاعتصامات عشان منخسرش الجمهور
مينفعش كم البنات اللي قلعت الحجاب بعد ما انضمت للثورة دي ده كده يطفش الناس
يوووه و كمان ستات بتدخن سجائر في الشارع؟ لا ده انتم مصرين تنفروا الناس منكم
يا ريت تشوفوا حل في موضوع الالحاد ده مينفعش يتقال ان الثورة بتخرج الناس عن دينها
بلاش كلام كثير عن اضطهاد المسيحيين الموضوع ده حساس و بيطفش الناس
بلاش بقى نتكلم عن بهائيين و شيعة هم كلهم كام نفر يعني؟
يا نهار اسود؟ مثليين ايه اللي ليهم حقوق و مينفعش يتحاكموا و يتعذبوا، انت قضيتك اكبر و أهم من كده بكثير و الناس تقول عليك ايه؟
بلاش بقى تضامن مع احمد ماهر لحسن ناس كثير مصدقة ان 6 ابريل عملاء
لا بص سيبك من اهل سيناء خالص احنا في حرب على الارهاب و ده مش وقته هتخسر الناس
اسلاميين ايه اللي ليهم حقوق و ده وقته برضه
اطفال الشوارع غلابة بس كثير منهم مجرمين و ده موضوع حساس
ما هو فرق الاندرجراوند بتاعتكم دي بتغني عن الحشيش و الحان غريبة عن ثقافتنا انت في الشارع تغني سيد درويش و الشيخ امام (سيبك من انهم في زمنهم كانوا شباب طائش مش ملتزم بالتابوهات و الناس بتحبهم عشان قباحتهم)
بص العلمانية بقيت كلمة وحشة، احنا نقول مدنية، و مينفعش نصطدم بالمجتمع فهنعتمد على وسطية الازهر بقى و نأيد تطبيق الشريعة بشرط الأزهر هو اللي يحدد و الشريعة مش معناها حدود رغم ان كل اللي رفع الشعار كان قصده الحدود بس احنا بقى بالذات هنقول الشريعة و نقصد علمانية لكن من غير ما نقول، انت ليه مش مصدق ان ده هينفع؟ ده حتى الأزهر وسطي جميل و ميطلعش منه العيبة ابدا خصوصا في حق الأقليات.
هو انت ليه متمسك بموضوع الأقليات ده اصلا؟ الأغلبية مطحونة و مضطهدة، احنا نشوف حقوق الذكر المسلم السني البالغ المتعلم اللي حالق شعره و بيحب ام كلثوم و بيشجع الأهلي الأول و بعدين نبقى ننتبه للناس الثانية.
.
.
.
مش قلنا انضموا لحزب الوفد انسبلكم؟